ტექსტი
მყინვარი
ტაბიძე გალაკტიონ95271 ნახვა · დღეს 17
ციკლიდან „პაციფიზმი“
ლიტერატურას ბევრი ტურისტი
ახლავს გვიანი,
ზოგი კუბისტი და ფუტურისტი,
ზოგიც ჭკვიანი.
ზოგი სიზმრებში არის გართული
როგორც ნიბლია,
ნატვრაა ზოგის მხოლოდ ქართული
სტილის ბიბლია.
ზოგს მყინვარზედაც უახლოესი
ააქვს ტალახი.
რომ იქ იპოვოს ავერეოსი,
ქრისტე, ალლახი.
იქ ეგულება მას მონასტერიც
მუხლმოდრეკილი,
თავის უამრავ ცოდვებს დასტირის
დრო - განდეგილი.
1930