ტექსტი

მხედარი ქალი

ტაბიძე გალაკტიონ

95264 ნახვა · დღეს 16

ციკლიდან „პაციფიზმი“

რომ დავინახე
მთები მაღალი,
ვთქვი: რა შვენება
ესაბამება.
გზაზე შემომხვდა
მხედარი ქალი
და საუბარი
ასე გამიბა:
ვარდებისა და
ზეცის მაგიერ
ახსენეთ ლექსში
ჰა, ეს მერანი.
მას ლურჯა ჰქვია,
მოამაგეა
ჩვენთვის ამ მერნის
გამომზერანი.
ცხენი - ცხენია,
მრავალ შრომისთვის,
არ-მოშიშარი
ომში ნარ-ეკლის,
თავის მრავალი
გამარჯვებისთვის
სიცოცხლეშივე
ღირსია ძეგლის!
მე ვეთანხმები
ახალგაზრდა ქალს,
ცხენი არ არის
თუმცა მედეა,
თუმც არც ვენერა
მილოსელსა ჰგავს,
თუმცა არც ძეგლის
მოიმედეა...

1930

არ გამოტოვო სიახლეები!

გამოგვყევი ლიტკლუბის Facebook გვერდზე და გაიგე ჩვენი სიახლეები.

გამოგვყევი Facebook-ზე