ტექსტი
* * * ეს არის ომი
ჯავახაძე ვახტანგ26994 ნახვა · დღეს 23
ეს არის ომი,
სისხლისმღვრელი,
ხანგრძლივი ომი,
სასტიკი,
სამკვდრო-სასიცოცხლო,
დაუნდობელი.
ერთ მხარეს დგანან: სერვანტესის დედა და დები,
ვან გოგოს ძმა და სააკაძის უმცროსი ბიჭი,
დეკაბრისტების ცოლები და პუშკინის ძიძა,
არმსტრონგისა და გაგარინის ამხანაგები...
მეორე მხარეს ერთსულოვნად ჩასაფრებულან:
ქრისტეს მოწაფე,
აბელის ძმა,
მეფისტოფელი,
ოძელაშვილის ნათლიმამა,
ჰამლეტის ბიძა,
ჰეროსტატე და
ნერონი და
სალიერი და
ჯორდანო ბრუნოს ჯალათი და ლორკას ჯალათი...
გრძელდება ომი,
სისხლისმღვრელი,
სასტიკი ომი.
1969