წვიმაში არაგვზე

გაწვიმდა. ქარმა დაკეცილი ფრთები გაშალა,

ნისლებს ხახაში ჩაეშრიტა ცხელი მზის ალი,

ძილმორეულმა წყარომ, ტყისპირს ძარღვებდამშრალმა

ისევ სიმღერა წამოიწყო ნამაისარი.

გაწვიმდა. ერთურთს ეხვევიან ტოტები ხეთა,

ვერხვთა შრიალზე დამღერიან არაგვის ზვირთნი

ღვართქაფ-გადავლილ ქარაფებზე შურთხები სხედან

და ხეზე ობლად დარჩენილი კანკალებს ფითრი...

გაწვიმდა. ნისლმა ჩასასვლელი ჩარაზა სანეს,

არწივნი მისხდნენ, ზეიმი აქვთ ჩხიკვებს და ყორნებს;

ჭალები ცხარედ ახორხოცდნენ არაგვისანი

და ნასოფლარში კიდევ ერთი ინგრევა ყორე